Fjárfestagoðsögn: Varar við gjaldmiðlakreppu

Fjárfestagoðsögnin Jim Rogers varar nú við því að gjaldmiðlakreppa gæti verið í aðsigi í kjölfar fjármálakreppunnar. Þess orð lét Roges falla í viðtali á CNBC.

Að sögn Rogers er yfirvofandi hætta á gjaldmiðlakreppu tilkomin vegna þess hve mikið af skuldum eru enn til staðar í alþjóðlega fjármálakerfinu. Samtíms ályktar hann að sá viðsnúningur sem er í efnahagslífi heimsins nú stafi af því að einkaneyslan hafi fallið svo dramatískt á síðasta ári að nú sé fólk einfaldlega að kaupa þá hluti sem það hefur brýna nauðsyn fyrir.

„Hvernig getur lausn á vandamálinu skuldir og neysla verið meiri skuldir og neysla," spyr Rogers. Hann bendir á að heilu fjöllin af skuldum sé enn til staðar sem ekkert hefur verið gert við. Til dæmis í miðhluta Evrópu. Á sama tíma vona menn að Kína muni enn draga vagninn út úr kreppunni.

„Kína hefur sparað mikið til að mæta slæmum tímum. Þeir eru komnir og Kínverjar nota nú sparnaðinn en Kína getur ekki dregið Bandaríkin, Indland eða Evrópu upp úr forinni," segir Rogers. „Hagkerfi Kína eru um tíundi hluti af hagkerfi Bandaríkjanna. Halelúja, látum þá gera góða hluti en þeir geta ekki bjargað heiminum."

Rogers er m.a.þekktur fyrir að hafa smíðað Rogers International Commodity Index, þekkt sem RICI vísitalan. Sú vístala mælir breytingar á hrávöruverði í heiminum og samanstendur af þróun á verðlagi 35 hrávara á 11 mismunandi hrávörumörkuðum.

Rogers er fyrrum viðskiptafélagi ofurfjárfestirins George Soros en saman stofnuðu þeir fjárfestingasjóðinn Quantum Fund á áttunda áratugnum. Á árunum upp úr 1990 sköpuðu þeir félagar oft mikið öngþveiti á gjaldmiðlamörkuðum heimsins með mjög umdeildri fjárfestingastefnu sinni.

Þeir urðu síðan heimsfrægir báðir tveir árið 1992 þegar þeir snýttu Englandsbanka um hátt í einn milljarð punda með því að taka risavaxna stöðu gegn pundinu. Þetta leiddi til þess að Bretland varð að segja sig úr ERM, evrópska myntsamstarfinu.