Orðrómur um að dularfullan málm sé að finna í gömlum Singer saumavélum hefur leitt til þess að þær ganga kaupum og sölum á 6 milljónir kr. stykkið í Saudi-Arabíu þessa daganna.
Orðrómurinn hefur farið sem eldur um sinu í Saudi-Arabíu og fréttir hafa borist um að brotist hafi verið inn á saumaverkstæði í landinu í leit að þessum vélum.
Samkvæmt orðróminum er hinn dýrmæta málm "rautt kvikasilfur" að finna í þessum saumavélum. Vandamálið er að rautt kvikasilfur er alls ekki í vélunum enda er sá málmur ekki til í raunveruleikanum.
Málmur þessi á að vera þeim eiginleikum gæddur að hægt er að búa til kjarnorkuvopn með honum, nota hann sem radsjárvörn og hann sé lykilatriði við byggingu eldflaugakerfa svo fátt eitt sé talið.
BBC greinir frá þessu máli og vitnar í tímaritið New Scientist sem skrifaði um "rautt kvikasilfur" árið 1996. "Í höndunum á svindlurum getur rautt kvikasilfur gert nánast hvað eina sem kaupandi þess óskar sér," sagði í tímaritinu á þessum tíma.
Fyrstu fregnir af rauðu kvikasilfri komust í umferð upp úr árinu 1980. Nú er vitað að það voru vestrænar leyniþjónustur sem komu orðróminum um málminn á kreik í viðleitni sinni til að hafa uppi á glæpamönnum sem smygluðu kjarnorkuvopnum.
