Lyfjarisinn GlaxoSmithKline í verulegum vandræðum

Breski lyfjarisinn GlaxoSmithkKline (GSK) er í verulegum vandræðum eftir að dómstóll í Pennsylvaníu dæmdi móður skaðabætur frá GSK upp á 2,5 milljónir dollara. Móðirin hafði fætt barn með hjartagalla eftir að hafa notað þunglyndislyfið Paxil meðan á meðgöngunni stóð.

Samkvæmt frétt á Bloomberg-fréttaveitunni komst dómstólinn að þeirri niðurstöðu að hjartgalla barnsins mætti rekja til Paxil notkunnar móðurinnar og að GSK hafi vitað af þessum hættulegu hliðarverkunum lyfsins. GSK hafi haldið þeim upplýsingum leyndum til að hámarka gróða sinn af sölu lyfsins.

GSK hefur áfrýjað niðurstöðu dómstólsins. Fram kemur á Bloomberg að þótt 2,5 milljónir dollara, eða um 300 milljónir kr., séu smáaurar fyrir lyfjarisann stafi vandræði GSK af því að 600 aðrir einstaklingar eru tilbúnir með málshöfuð gegn GSK vegna afleiðinga Paxil notkunnar fari svo að áfrýjunardómstóll staðfesti fyrrgreinda niðurstöðu í málinu í Pennsylvaníu.

Paxil var samþykkt í Bandaríkjunum árið 1992 og í fyrra numu tekjur GSK af sölu þess samtals um 116 milljörðum kr.

Fyrir utan þetta mál eru í gangi önnur skaðabótamál gegn GSK vegna Paxil í Bandaríkjunum, Kanada og Bretlandi.