Kaupþing fékk greidda 4 milljarða frá JJB Sports

Kaupþing hefur fengið greitt 20 milljón punda lán, eða rúmlega 4 milljarða kr., frá bresku sportvöruverslanakeðjunni JJB Sports og er þar með komið að mestu út úr rekstri keðjunnar.

Snemma í vor seldi Kaupþing 23% hlut sem það átti í JJB Sports en sá hlutur hafði verið rekinn af Chris Ronnie og Exista með veðkalli í vetur. Ekki liggur fyrir hve mikið fékkst fyrir þann hlut.

Samkvæmt frétt á Timesonline var JJB Sports "hættulega nálægt gjaldþroti" í ár eftir að Kaupþing neitaði að framlengja 20 milljón punda láninu til keðjunnar.

Hinsvegar framtíð JJB Sports tryggð í fyrir um mánuði síðan er hinir tveir viðskiptabankar keðjunnar, Barclays og Lloyds, veittu keðjunni 25 milljón punda lán hvor banki. Times segir að það fé hafi m.a. verið notað til að gera upp lánið frá Kaupþingi.

JJB Sports ætlar nú að afla sér 50 milljón punda með hlutafjárútboði en það er fjárfestingarbankinn Lazard sem er keðjunni til ráðgjafar með útboðið.

Fyrr í ár bjargaði JJB Sports sér frá falli með sölu á líkamsræktarstöðvum sínum fyrir rúmlega 83 milljónir punda en rekstur keðjunnar er áfram þungur í skauti. Ekki er reiknað með að reksturinn fari að skila hagnaði að nýju fyrr en á fjórða ársfjórðungi þessa árs.