FIH bankinn orðinn einn af stærstu eigendum Sjælsö Gruppen

FIH bankinn er nú orðinn einn af stærstu eigendum Sjælsö Gruppen sem er stærsta fasteignafélag Danmerkur. Eftir nýafstaðna hlutafjáraukningu hjá Sjælsö á FIH bankinn 17% í félaginu en stærsti hluthafinn er SG Nord Holding með 25% hlut.

FIH bankinn er sem kunnugt er í eigu Kaupþings en Seðlabankinn á allsherjarveð í honum fyrir 500 milljón evra neyðarláni sem Seðlabankinn veitti Kaupþingi á lokadögum þess banka í hruninu í fyrrahaust. SG Nord er svo aftur að hluta til, eða 30%, í eigu Cube Properties sem er skráð til heimilis á Kýpur.

Cube Properties hét áður Novator Properties og var að 69% í eigu þeirra feðga Björgólfs Guðmundssonar og Björgólfs Thor Björgólfssonar gegnum félagið Samson Holdings. Þrotabú Samson Holding á nú um 60% af hlutunum í Cube Properties. Kröfuhafar Samson séu svo aftur íslenskir og þýskir bankar ásamt lífeyrisjóðum.

Í frétt um breytingar á eigendahópi Sjælsö segir að auk FIH banka eigi Amagerbanken og Viscardi um 10% hvor banki í Sjælsö. Þessir þrír bankar sölutryggðu hlutafjáraukninguna upp á rúmlega 500 milljónir danskra kr. og sitja uppi með 37% af þeirri upphæð. Hlutur FIH nemur því 85 milljónum danskra kr. eða um 2,1 milljarði kr.

Flemming J. Jensen forstjóri Sjælsö Gruppen segir að hann sé ánægður með að hlutafjáraukningunni sé lokið því þar með hafi félagið fengið lífsnauðsynlegt lausafé til rekstrar síns.