Danska lögreglan ræður ekki við málafjöldan frá skattinum

Í frétt um málið í blaðinu Politiken segir að ríkisskattstjóri Danmerkur óttist að glæpamennirnir fái mildari dóma en ella sökum þessa ástands. Lögreglan ber við skorti á mannskap við að rannsaka öll þessi mál frá skattinum.

„Í augnablikinu eigum við í miklum vandræðum með flöskuhálsa hjá lögreglunni," segir Ole Kjær ríkisskattstjóri Danmerkur í samtali við Politiken. „Málin hrúgast upp þar sem ákæruvaldið hefur ekki undan að afgreiða þau."

Hin mikla aukning á fjármálaglæpum í Danmörku er tilkomin vegna kreppunnar þar í landi. Í augnablikinu liggur lögreglan með 370 ókláruð mál á þessum vettvangi og sá bunki mun aukast töluvert á næstu mánuðum. Bara skatturinn er tilbúinn að senda lögreglunni 93 ný mál en þau eiga það sameiginlegt að upphæðirnar í þeim eru allar yfir 2,5 milljónum kr.