Eigendur D´Angleterre hafa tapað öllu eiginfé

Íslenska félagið NP Hotels Holding, sem á m.a. hótelin D´Angleterre og Kong Fredrik, hefur tapað öllu eigin fé sínu og er eiginfjárstaðan orðin neikvæð um 3 milljónir danskra kr. eða 72 milljónir kr. Tapið af rekstri NP Hotels Holding á síðasta ári nam 22 milljónum dkr. eða rúmlega hálfum milljarði kr.

Þetta kemur fram í umfjöllun business.dk um ársuppgjör félagsins. Þrátt fyrir tapið og neikvæða eiginfjárstöðu hefur félagið gefið út yfirlýsingu um að það ætli sér að halda þessum eignum sínum áfram. Fyrir utan fyrrgreind hótel eru þessar eigur, hótelið Front og veitingastaðurinn Copenhagen Corner.

Business.dk segir að tapið sé tilkomið vegna slæmrar blöndu af minnkandi tekjum og auknum kostnaði hjá dótturfélögum NP. Þar að auki hefur NP neyðst til að afskrifa viðskiptavild sína í bókhaldinu niður í núllið.

Samkvæmt dönskum lög mega félag ekki vera rekin með neikvætt eiginfé í lengri tíma. Því hafa eigendur NP gefið út svokallaða stuðningsyfirlýsingu sem þýðir að hluti af um 300 milljón dkr. skuldum þess verði breytt í hlutafé.

Business.dk nefnir að mikill áhugi hafi verið á síðustu mánuðum hjá fjárfestum að yfirtaka rekstur D´Angleterre. Hinsvegar hefur NP ekki áhuga á því að selja að svo stöddu og hafa gripið til ýmissa hagræðingar og sparnaðaraðgerðar. M.a. hefur veitingastaðnum Le Coq Rouge verið lokað og rekstur Hotel Front hefur verið leigður út.