Það hefur vakið nokkra athygli að körfuknattleikslið KR sé ekki búið að ráða þjálfara þó svo það sé kominn júní. Böðvar Guðjónsson, formaður körfuknattleiksdeildar KR, segir að menn í Vesturbænum séu ekkert að fara á taugum og allt þokist í rétta átt.
„Okkur liggur ekkert á. Það er enn langt í mót. Við höfum verið í viðræðum við Victor Finora í talsverðan tíma og þær viðræður eru enn í gangi. Ég er að vonast til þess að það mál gangi upp,“ sagði Böðvar en Finora þjálfaði þrjá yngri flokka hjá KR í fyrra á meðan eiginkona hans, Jenny, spilaði með kvennaliði félagsins.
„Jenny er búin að fá vinnu úti í Bandaríkjunum þannig að hann kæmi einn ef hann kemur. Við viljum að hann taki við karlaliðinu og þjálfi áfram yngri flokkana. Hann kæmi þá í fullt starf hjá okkur. Í fullkomnum heimi værum við búnir að ganga frá þessu en ég er samt alveg rólegur.“
Böðvar segir íslenska þjálfara ekki vera í myndinni sem stendur. Friðrik Ragnarsson er á meðal þeirra íslensku þjálfara sem eru á lausu en Böðvar segist ekkert hafa rætt við hann.
Nokkrar breytingar verða á KR-liðinu milli ára en félagið hefur fengið Hreggvið Magnússon frá ÍR og svo verður Pavel Ermolinskij væntanlega áfram í herbúðum liðsins. Pavel kom afar sterkur inn í lið KR í fyrra og það eru mjög góð tíðindi fyrir Vesturbæinga ef hann verður áfram.
„Hann er að vinna í því að fá sig lausan frá félaginu sínu úti. Hann vill koma og taka eitt gott ár hjá okkur eins og Jón Arnór og Jakob gerðu. Ég myndi segja að það væru svona 99 prósent líkur á því að Pavel spili áfram í Vesturbænum næsta vetur,“ sagði Böðvar ákveðinn.
Böðvar segir allt á réttri leið hjá KR
Henry Birgir Gunnarsson skrifar

Mest lesið



„Einu skrefi nær því að verða næsti Sir Alex Ferguson“
Íslenski boltinn


Leik KR og ÍBV seinkað vegna færðar
Íslenski boltinn

Fjögur lið á toppnum með fjögur stig
Íslenski boltinn

Guðni Eiríksson: Markmannstaðan á Íslandi er ekki nógu góð
Íslenski boltinn

Arne Slot vonsvikinn með Trent Alexander-Arnold
Enski boltinn


Arteta varar Arsenal fólk við: Erfiðasta staðan að fylla
Enski boltinn