Hjalti Þór: Tilefni til þess að brosa

„Langþráður sigur og tilefni til þess að brosa núna. Það er búið að vera stígandi í liðinu og ég er búinn að bíða eftir sigri í deildinni síðan í desember," sagði Hjalti Þór Pálmason, leikmaður Gróttu, eftir 29-26 sigur á Akureyri í dag.

„Við erum búnir að vera ótrúlega nálægt því að sigra marga leiki en svo missum við þá frá okkur í lokin. Þetta hefur verið eitthvað sálrænt sem við höfum ekki komist að hvað er. Þetta drama í kringum að Halldór tekur við Hauka-liðinu þjappar okkur bara saman og gerir okkur sterkari," bætti Hjalti við.

Hjalti Þór átti frábæran leik og skoraði ellefu mörk fyrir Gróttu-liðið.

„Þetta var einn af þessum fáu dögum sem að allt gengur upp og það er bara mjög gott," sagði Hjalti ánægður eftir leikinn í dag.