Ingi Þór: Jeb Ivey er ekki að koma til að vinna þetta einvígi fyrir okkur

Ingi Þór Steinþórsson, þjálfari Snæfells, var ánægður með frábæran sigur sinna manna á Keflavík í öðrum leik liðanna um Íslandsmeistaratitilinn í Iceland Express deild karla. Snæfellsliðið lék frábærlega og vann sannfærandi 91-69.

„Við vorum miklu betra liðið allan tímann og allar 40 mínúturnar. Það var sama hvað þeir reyndu að svara því við vorum tilbúnir í allan fjandann," sagði Ingi Þór í viðtali við Hörð Magnússon í útsendingu Stöðvar 2 Sport í kvöld.

„Þetta er liðið sem lagði KR að velli en ekki liðið sem mætti í leikinn á mánudaginn. Það var bölvuð værukærð í mönnum í fyrsta leiknum og ég veit ekki með hvernig hugarfari leikmennirnir komu með í þann leik. Ég er mjög stoltur af því hvernig hugarfarið var í þessum leik og hvernig stuðningurinn í húsinu var í kvöld," sagði Ingi.

„Það er bara einn dagur á milli leikja og Jeb Ivey þarf greinilega að fara yfir leikkerfin hjá liðinu. Ég er samt mjög stoltur af því hvernig hann kemur inn í þennan leik. Ég byrjaði ekki með hann inn á í einhverri örvæntingu heldur sýndi mínum mönnum traust. Pálmi byrjaði í leikstjórendastöðunni í sínum fyrsta leik síðan í nóvember og mér fannst hann leysa það gríðarlega vel," sagði Ingi.

„Menn voru virkilega á tánum og tilbúnir að gera allt fyrir hvern annan. Við sýndum það í dag að Jeb Ivey er ekki að koma til að vinna þetta einvígi fyrir okkur heldur ætlar liðið að vinna þetta saman," segir Ingi sem var ekkert svekktur út í þá sem voru að spá einvíginu 3-0 fyrir Keflavík eftir fyrsta leikinn.

„Ég skil þá sem spáðu þessu einvígi 3-0 fyrir Keflavík því ég hefði gert það sama eftir fyrsta leikinn. Við sýndum akkúrat ekki neitt í þeim leik og við létum Keflvíkingana líta virkilega vel út. Ég hefði örugglega spáð þessu sópi líka ef ég hefði staðið utan við Snæfellsliðið," sagði Ingi Þór.