Verðfall á öllum mörkuðum

Samkvæmt frétt um málið á börsen.dk féllu hlutabréf á Wall Street undir lok markaðarins þar í gærkvöldi og endaði Dow Jones vísitalan í mínus 1,2%. Þetta olli svo aftur verðfalli í Asíu í nótt.

Verðfallið í kauphöllum Evrópu frá opnun þeirra í morgun er á bilinu 2,5% til 4%. Þannig lækkaði FTSE vísitalan í London um 3%, Dax í Frankfurt um tæp 3% og Cac 40 í París um rúm 3%. Í Kaupmannahöfn lækkaði C20 vísitalan um 2,5%.

Ástæðan fyrir þessum lækkunum er, auk skuldakreppunnar í suðurhluta Evrópu, að fjárfestar eru farnir að efast um styrkleika banka. Yfirtaka spænskra stjórnvalda á sparisjóðnum Cajasur þykir til marks um að þessar efasemdir eigi við rök að styðjast.