Mótorhjólasamtök áberandi í dönskum fyrirtækjarekstri

Samkvæmt ítarlegum frásögnum í bæði Berlingske Tidenede og Jyllands Posten eru meðlimur fyrrgreindra samtaka, yfirleitt kallaðir rockers í Danmörku, grunaðir um að nota lögmæt fyrirtæki til peningaþvættis og til að leyna tekjum sínum af ólöglegri starfsemi eins og eiturlyfjasmygli/sölu og vændi.

Fyrirtækin sem rockararnir eiga og reka eru fjárfestingarfélög, fasteignafélög og flutningsfyrirtæki svo dæmi séu tekin. Þá er einnig þekkt að rockarar noti félög í skattaskjólum til að greiða sér ofurlaun og þannig geta þeir réttlætt eignir í Danmörku eins og lúxusíbúðir og bíla.

Ole Madsen lögreglustjóri hjá lögreglunnar á Austur-Jótlandi segir í samtali við Berlingske Tidende að embætti sitt hafi unnið frá árinu 2002 að ná til rockara í gegnum fjármálastúss þeirra. „Við getum samt ekki bara gefið út aðvaranir um að þetta eða hitt fyrirtæki sé í eigu rockara. Þannig gengur þetta ekki fyrir sig í Danmörku," segir Madsen. „En við erum í auknum mæli að ná til þeirra sem starfa með rockurum í þessum fyrirtækjarekstri."

Meðal dæma um rockara í fyrirtækjarekstri er Jens-Peter Kristiansen fyrrum forseti Hells Angels í Kaupmannahöfn. Jens hefur viðurnefnið „Smukke" og hefur afplánað 12 ára dóm fyrir þátt sinn í morðinu á „Makrílnum" fyrrum forseta Bandidos í borginni. Jens hefur m.a. stofnað félögn JR Entreprise Aps og KMS A/S og hann er forstjóri félagsins Selskabet af 31/12-2000.

Annar háttsettur Hells Angels meðlimur, Brian Sandberg, hefur tengst flutningsfyrirtækjum og sendibílaleigum og hann rekur nú öryggisþjónustuna BS Consultancy. Síðastnefnda fyrirtækið útvegaði m.a. lífverði handa hinum þekkta fjársvikara Stein Bagger.

Jan Bachman Nielsen forseti Bandidos í Hilleröd rekur fjölda fyrirtækja í samstarfi við eiginkonu sína. Má þar m.a. nefna Moles Entreprise og 21 og Århundrede 03 en hið síðarnefna á fatabúð, hárgreiðslustofu og verslar þar að auki með fasteignir.