Arnór: Við erum komnir nær þeim

„Þetta eru helvíti góðir handboltamenn en það þarf ekki töfrabrögð til að stöðva þá," sagði Arnór Atlason eftir tapleikinn gegn Frökkum í dag. Arnór átti fínan leik og skoraði sex mörk í þessum seinni leik.

„Tvær fullar hallir og það er leiðinlegt að hafa ekki getað borgað áhorfendum til baka og unnið annan leikinn."

„Við gerðum jafntefli í gær og töpuðum með þremur í dag. Við erum komnir nær þeim. Það mikilvægasta sem við getum tekið út úr þessu er að við getum staðið í þeim. Það hefur vantað í hausinn á okkur í síðustu leikjum á móti þeim," sagði Arnór sem vonar að eldgosið í Eyjafjallajökli hindri það ekki að hann komist aftur til Danmerkur.

„Nú er úrslitakeppnin í Danmörku framundan. Ég vona að ég fái góðan endi með FCK og við ætlum okkur að verða Danmerkurmeistarar. Nú tjekkar maður á textavarpinu hvort maður komist ekki heim."