Haukar lögðu KR-inga

Fyrsta umferð Iceland Express-deild kvenna fór fram í kvöld þar sem Haukar unnu til að mynda góðan sigur á KR á heimavelli, 65-64.

KR-ingar byrjuðu betur í leiknum og náðu til að mynda fimmtán stiga forystu í öðrum leikhluta, 34-19.

En Haukar skoruðu síðustu fjórtán stigin í fyrri hálfleik og komust svo yfir með fyrstu körfunni í þeim síðari, 35-34.

Jafnræði var með liðunum eftir þetta en Haukar náðu forystu í upphafi fjórða leikhluta sem þeir létu ekki aftur af hendi.

Hildur Sigurðardóttir náði að minnka muninn í eitt stig þegar níu sekúndur voru eftir en nær komst KR ekki.

Íris Sverrisdóttir skoraði 20 stig fyrir Hauka og Ragna Margrét Brynjarsdóttir fimmtán. Hjá KR var Hildur stigahæst með 26 stig og Margrét Kara Sturludóttir kom næst með sextán.

Úrslit annarra leikja í kvöld:

Grindavík - Fjölnir 70-67

Hamar - Snæfell 92-71

Njarðvík - Keflavík 77-82