Umfjöllun: Sveinbjörn átti stórleik í Kaplakrika

Leik FH og Akureyri lauk með 33-25 sigri gestanna í Kaplakrika í dag. Með þessu halda Akureyringar sér á toppnum og en þeir eru búnir að vinna alla sína leiki á meðan FH-ingar eru áfram í 4. sæti.

FH þurftu nauðsynlega á sigri að halda ef þeir ætluðu sér ekki að missa Akureyringa of langt fram úr sér á toppnum. FH var spáð fyrsta sætinu í deildinni fyrir tímabilið og það munaði 4 stigum á liðunum fyrir þennan leik. Þessi leikur var einnig sérstakur fyrir Bjarna Fritzson leikmann Akureyri sem spilaði með FH á síðasta tímabili.

Leikurinn var í járnum allan fyrri hálfleikinn en Akureyringar náðu að taka 2 marka forskot rétt fyrir hálfleik og héldu því inn í hálfleikinn en staðan var 15-13 fyrir gestina. Forskot Akureyringa byggðist helst á því að í fyrri hálfleik varði Sveinbjörn Pétursson í marki Akureyri 12 skot á meðan markmenn FH vörðu aðeins 3.

Það var þó ljóst að Akureyringar ætluðu ekki að láta FH stöðva sigurgöngu sína og komu þeir mjög grimmir inn í seinni hálfleik. Markvarslan hélt áfram að vera frábær og þeir náðu að stinga FH af um miðjan seinni hálfleik. Leiknum lauk síðan með öruggum 8 marka sigri þeirra.

Markvarsla Sveinbjörns Péturssonar skóp þennan sigur og fær vörn Akureyringa einnig gott hrós en FH virtust fáar lausnir hafa við varnarleik þeirra og tóku oft erfið skot sem Sveinbjörn varði af öryggi.



FH - Akureyri 25-33 (13-15)

Mörk FH (skot): Ólafur Gústafsson 7(15), Ólafur A. Guðmundsson 6(17), Ásbjörn Friðriksson 4/2(7/2), Atli R. Steinþórsson 3(3), Logi Geirsson 2(8), Benedikt R. Kristinsson 1(2), Hermann R. Björnsson 1(2), Halldór Guðjónsson 1(1)

Varin skot: Pálmar Pétursson 6 (25/3, 24%), Daníel Freyr Andrésson 5 (18/1, 28%).

Hraðaupphlaup: 1 (Ólafur Guðmundsson).

Fiskuð víti: 2 (Atli R. Steinþórsson).

Utan vallar: 8 mínútur.



Mörk Akureyri (skot): Bjarni Fritzson 9/4 (12/4), Oddur Grétarsson 6 (10), Guðmundur H. Helgason 6 (10), Geir Guðmundsson 5 (12), Heimir Ö. Árnason 5 (6), Guðlaugur Arnarson 1 (1)

Varin skot: Sveinbjörn Pétursson 27 (52/2, 52%)

Hraðaupphlaupsmörk: 4 ( Bjarni Fritzson 3, Guðlaugur Arnarson).

Fiskuð víti: 5 (Guðlaugur Arnarsson, Oddur Grétarsson, Guðmundur H. Helgason, Hörður F. Sigþórsson).

Utan vallar: 12 mínútur