Kína á bremsunni, bindiskyldan aukin í annað sinn

Í frétt um málið á Bloomberg-fréttaveitunni segir að hækkunin nemi 0,5 prósentustigum. Bindiskylda stærri banka í Kína stendur nú í 16% en hjá minni bönkum er hún 14%. Hin nýja hækkun á að ganga í gildi þann 25. febrúar n.k. að því er segir á vefsíðu kínverska seðlabankans.

Stjórnvöld í Kína eru að reyna að koma í veg fyrir eignabólu í landinu og jafnframt að forðast meiri verðbólgu. Töluverð hætta er á að eignabólan fari úr böndunum eftir að kínversk stjórnvöld dældu miklu fé í hagkerfið í fyrra til að vinna gegn áhrifum fjármálakreppunnar. Eignabólan hefur verið keyrð áfram með miklum útlánum hjá bönkum landsins.

Bindiskyldan hjá kínverskum bönkum var hækkuð síðast þann 12. janúar s.l. en fram að þeim tíma hafði hún verið óbreytt frá árinu 2008. Hækkun kom í kjölfar þess að bankar landsins höfðu lánað viðskiptavinum sínum 1.400 milljarða dollara á síðasta ár en útlán höfðu þá aldrei verið meiri á einu ári í landinu. Ekkert lát varð síðan á útlánunum í janúar s.l. og því var gripið til þess að hækka bindiskyldu bankanna.