Efnaðir Danir óttast um auðæfi sín í bönkunum

Bankpakke I var fyrsta opinbera aðstoð danskra stjórnvalda við bankakerfi landsins í kreppunni á síðasta ári. Samkvæmt honum voru m.a. allar innistæður í dönskum bönkum tryggðar af ríkisvaldinu upp að 375.000 dönskum kr. á hvern reikning.

Samkvæmt frétt í Jyllands Posten óttast margir efnaðir Danir að einhverjir af bönkunum muni komast í þrot og eru því að skipta auðæfum sínum á reikninga í fleiri en einum banka. Þannig telja þeir að fé sitt sé betur tryggt ef allt fer á versta veg.

„Fólk er að verða ákaflega taugaveiklað yfir innistæðum sínum," segir Elisabeth Arendt hjá Mybanker sem tekur saman tölur um verð hjá bönkum og fjármálastofnunum. „Ég fæ að meðaltali þrjár fyrirspurnir á dag um tryggingarnar á innistæðum. Danir sem eiga stórar upphæðir inni í bönkunum óttast hvað gerist þegar ríkisábyrgðin fellur niður þann 1. október í ár."

Á móti því að ríkisábyrgðin fellur niður á þessum tíma mun tryggingin sem tryggingasjóður innistæðna í Danmörku veitir verða hækkuð í 700.000 danskar kr. Fólk sem á milljónir inni á bankabókum er því í hættu á að missa allt umfram þessa upphæð ef allt fer á versta veg.

Arendt segir að sökum þessa ótta sé fólk að dreifa fé sínu á fleiri reikninga. Þannig að einstaklingur sem á 3 milljónir danskra kr. setur nú 750.000 dkr. inn á fjóra reikninga í fjórum bönkum.