Örlög Eik Banki ráðast í dag

Færeyska landsstjórnin hélt neyðarfund í gærkvöldi vegna beiðni Eik Banki um ríkisábyrgð upp á 12 milljarða kr. Á fundinum sátu fulltrúar stjórnarandstöðunnar í Færeyjum. Eins og fram hefur komið í fréttum hefur tryggingarfélagið TF Holding lofað framlagi upp á rúma 8 milljarða kr. en danska fjármálaeftirlitið gerir kröfu um 24 milljarða kr. í nýju fjármagni til að bankinn standist kröfur danska fjármálaeftirlitisins um eiginfjárhlutfall og greiðsluþol.

Eidesgaard segir í samtali við business.dk að það sé enginn vilji í Færeyjum til að bjarga dótturbanka Eik Banki í Danmörku. Menn séu að einbeita sér að því að bjarga starfsemi bankans í Færeyjum. Eidesgaard bendir á að margir Færeyingar muni eftir því sem gerðist árið 1992 þegar Danske Bank hljóp frá ábyrgð sinni í færeyska bankahruninu það árið. Nú sé það sama að gerast bara með öfugum formerkjum.

„Okkur finnst það verulega ósanngjarnt að Fæeyjar eigi að leysa þau miklu vandamál sem blasa við á aðeins 72 klukkustundum, „ segir Eidesgaard. „Því vonum við að danska fjármálaeftirlitið gefi frest upp á fjórar vikur svo við getum leyst vandamálin í friði og ró."