Danski auðmannabankinn Capinordic lýstur gjaldþrota

Í frétt um málið á börsen.dk segir að stjórn Capinordic vænti þess að bankaumsýsla Danmerkur (Finansiel Stabilitet) taki yfir þrotabúið og þar með starfsemi bankans.

Í tilkynningu frá stjórn Capinordic segir að hún muni fylgjast með þróun mála í þrotabúinu til að tryggja að verðmæti núverandi eigna bankans verði tryggt á besta mögulegan hátt.

Í frétt um málið í Jyllands Posten í gær segir að upphaflega hafi Capinordic fengið frest hjá fjármálaeftirlitinu til 3. febrúar s.l. til að koma eiginfjárhlutfalli sínu í lag. Sá frestur var síðan framlengdur til 10. febrúar.

Á meðan á frestinum stóð reyndi Capinordic ákaft að útvega það fjármagn sem til þurfti en án árangurs.

Fyrir utan að geta ekki uppfyllt kröfur um eiginfjárhlutfall er allt útlit fyrir að Capinordic muni sýna tap upp á 1.275 til 1.375 milljón danskrar kr. fyrir árið í fyrra. Þetta er snöggtum meira tap en stjórn bankans greindi fjárfestum sínum frá í síðasta mánuði. Þá lágu tölurnar um tapið á bilinu 140 til 170 milljónir danskra kr.

Capinordic hefur viðurnefnið „velhaverbanken" í Danmörku þar sem viðskiptavinir hans hafa einkum verið danskir auðmenn eða hinir efnameiri Danir í gegnum árin.