Auðugur Rússi kaupir yfirgefið kaldastríðsþorp

Auðugur Rússi hefur keypt draugaþorpið Skrunda-1 í Lettlandi en síðasti íbúinn yfirgaf þessa 5.000 manna byggð árið 1998. Rússneski herinn rak Skrunda-1 á tímum kaldastríðsins.

Samkvæmt frétt í blaðinu Dagens Industri var það rússneska félagið Aleksejevskoje-Serviss sem borgaði tæplega 400 milljónir kr. fyrir Skrunda-1 en seljandinn var einkavæðingarnefnd Lettlands. Ónafngreindur auðugur Rússi stendur að baki félaginu en ekki er vitað hvað not hann ætlar sér af þorpinu.

Skrunda-1 var byggt með mikilli leynd árið 1980 en staðurin hýsti meðal annars eina af stærstu radsjárstöðvum Rússa sem nota átti til að fylgjast með ferðum kjarnorkueldflauga um lofthvelið. Stöðin nýttist áfram þótt kaldastríðinu lyki og var fyrst aflögð þegar Rússar yfirgáfu Lettland.

Fram kemur í fréttinni að eftir að Rússar yfirgáfu Skrunda-1 hafi Bandaríkjamenn sprengt eina af radarstöðvunum í loft upp við hátíðlega athöfn. Rúmlega tugur bygginga, þar með talin fjölbýlishús, eru enn uppistandandi í þorpinu en í lélegu ásigkomulagi.

Talsmaður einkavæðingarnefndar Lettlands er ánægður með söluna á þorpinu enda hafi hún gefið af sér tífalt matsverð.