Jólavertíðin sló met hjá leikfangaverslunum Hamleys

Hamleys er nú alfarið í eigu Íslendinga, skilanefnd Landsbankans fer með tæplega 64% hlut sem áður var í eigu Baugs og það sem upp á vantar er í eigu þrotabús Fons.

Í tilkynningu frá Hamleys um málið segir að á níu mánaða tímabili fram til desember í fyrra hafi söluaukningin numið 7,2% miðað við sama tímabili í fyrra. Með hinni góðu jólasölu hafi fjárhagsstaða Hamleys batnað að mun og nú sé gert ráð fyrir að brúttóhagnaður (EBITA) af rekstrinum muni aukast um 42,% á milli áranna 2008 og 2009.

Guðjón Reynisson stjórnarformaður Hamleys segir að menn séu mjög ánægðir með útkomuna yfir jólin enda sú vertíð mikilvæg fyrir söluna log fyrir fjárhagsárið í heild.

„Jólavertíðin kom sterkt inn hjá okkur í flaggskipinu, búð okkar í Regent Street, sem átti sín bestu jól í sögu fyrirtækisins," segir Guðjón. „Einnig erum við ánægð með söluna í stærstu búð okkar í Glasgow sem fór verulega fram úr væntingum."

Þá var salan í Dubai einnig umfram væntingar en hún jókst um 54% milli ára. Segir Guðjón að þetta sýni sterka stöðu Hamleys á heimsvísu.

Árið 2010 verður sögulegt hjá Hamleys því verslunarkeðjan fagnar 250 ára afmæli sínu í febrúar næstkomandi.