Ingvar: Þetta var bara lélegt hjá okkur í dag

„Það er lítið hægt að segja núna. Þetta var bara lélegt hjá okkur í dag, sérstaklega sóknarlega en við stóðum vörnina ágætlega á köflum.

Við náðum samt náttúrulega að jafna leikinn í síðari hálfleik og ég hélt að þetta væri að koma þá en þetta gekk bara ekki upp og við misstum þá of langt fram úr okkur," sagði fyrirliðinn Ingvar Árnason hjá Val eftir 23-15 tap liðs síns gegn Haukum í úrslitaleik Eimskipsbikarsins.

„Þegar við lentum tveimur eða þremur mörkum undir á síðustu tíu mínútunum þá þurftum við að fara að taka sjensa og það féll bara allt með þeim og því fór sem fór.

Birkir var líka frábær hjá þeim í markinu og við náðum ekki að finna leið framhjá honum á lokakaflanum. Það var svekkjandi að allt skildi ganga upp hjá þeim en ekkert hjá okkur," sagði Ingvar svekktur í leikslok.