Rússneskur auðmaður vill kaupa hlut Straums í West Ham

Rússneski milljarðamæringurinn Len Blavatnik er nú orðaður við kaup á eftirstandandi hlut Straums í enska úrvalsdeildarliðinu West Ham.

Samkvæmt vefsíðunni eatsleepsport hefur Blavatnik áhuga á því að leggja fram 30 milljón punda eða um 5,6 milljarða kr. tilboð í 35% hlut í félaginu. Straumur á nú 40% en 60% eru í eigu félaganna David Sullivan og David Gold.

Blavatnik er í 93. sæti yfir auðugustu menn heimsins en auður hans er metinn á 5 milljarða punda eða 940 milljarða kr. Hann hefur búið lengi í Bandaríkjunum.

Auður Blavatnik byggist á eignarhlutum í rússneskum olíufélögum hér á árum áður en hann á einnig hlut í Rusal, stærsta álframleiðenda heimsins.