Saudi Arabar vilja halda olíuverðinu undir 80 dollurum

Saudi Arabar vilja halda heimsmarkaðsverði á olíu undir 80 dollurum á tunnuna. Þetta kom fram á fundi OPEC ríkjanna um helgina. Ali al-Naimi olíumálaráðherra Saudi Arabíu segir að ..."70 til 80 dollarar eru gott verð."

Þessi ummæli lét ráðherrann falla eftir að OPEC ríkin ákváðu á fundinum að halda framleiðslutakmörkunum sínum áfram þrátt fyrir að verð á olíu hafi farið yfir 90 dollara á tunnuna í síðustu viku. Í frétt á Reuters um málið segir að sérfræðinar hafi átt von á þessari ákvörðun.

Þar sem næsti fundur OPEC er ekki fyrr en í byrjun júní á næsta ári munu olíumarkaðir örugglega láta reyna á orð Ali al-Naimi.

„Það sem málið snýst í raun um er hvort aukið magn komi á markaðinn," segir Lawrence Eagles yfirmaður olíurannsókna hjá JP Morgan í New York. „Ráðherrann sagði að 80 dollarar væru hámarksverðið. Sjáum til hvort hann fylgir þessum orðum eftir með meira magni af olíu."

Verð á olíu var tæplega 88 dollarar á tunnuna við lok markaða á föstudag. Það fór í 90,7 dollara um miðja vikuna og hafði þá ekki verið hærra í tvö ár.