Persónuleg gjaldþrot aukast verulega í Danmörku

Blaðið 24timer fjallar um málið. Þar kemur fram að neytendasamtök landsins hafi brugðist við þessu með nýju tilboði um persónulega skuldaráðgjöf í borgunum Kaupmannahöfn, Óðinsvéum, Álaborg og Esbjerg. Mikil ásókn hefur verið í þessa ráðgjöf og segir stjórnandi hennar, Anette Mathiasen, að nú séu um 200 manns á biðlista.

Ráðgjöfin er ókeypis en hún er einkum ætluð þeim sem standa illa félagslega. Mathiasen segir að hún geti þar að auki verið vörn gegn þunglyndi hjá þeim sem skulda mikið.

„Ef maður er í vandræðum fjárhagslega er oft ekki langt í þunglyndi og skilnaði. Því er fólk yfirleitt ánægt með að fá skýra yfirsýn yfir efnahagslega stöðu sína," segir Mathiasen.

Troels Holmberg hjá neytendaráði landsins (Forbrugerrådet) segir að mikil aðsókn í fyrrgreinda ráðgjöf komi sér ekki á óvart. Það séu ekki aðeins þeir sem eru illa staddir fjárhagslega sem þurfi á þessari aðstoða að halda.

„Nú þarf að borga reikninginn fyrir neysluveisluna," segir Holmberg. „Það er ekki bara þeir verst settu sem hafa tekið of mikið af lánum."