Skortur á demöntum í augsýn, De Beers sker niður

Demantar vara að eilífu en það sama gildir ekki um demantanámur. Af þeim sökum hefur De Beers, stærsti framleiðandi á hrádemöntum í heiminum, ákveðið að skera niður framleiðslu sina. Framboðið er ekki nægt til að sinna eftirspurninni.

Fjallað er um málið í Financial Times. Þar segir að á síðustu 20 árum hafi ekki fundist nýjar demantanámur eins og þær sem De Beers á í Afriku né þær sem rússneski framleiðandinn Alrosa á í Rússlandi en Alrosa er næststærsti framleiðandinn á eftir De Beers. Á sama tíma hefur notkun á demöntum vaxið verulega, einkum í Asíu.

De Beers ræður yfir um 40% af demantaframleiðslu heimsins og mun frá næsta ári takmarka framboð sitt við 40 milljón karöt á ári. Til samanburðar nam framboð De Beers 48 milljónum karata árið 2008.

Fari svo að ákvörðun De Beers leiði til minnkandi framboðs á heimsvísu mun það þýða að demantar hækka í verði um 5% á ári næstu fimm ár, að mati Des Kilalea hjá RBC Capital Markets.

De Beers segir að ákvörðun sín byggi á náttúruverndarsjónarmiðum, dematar séu náttúruauðlind sem fari þverrandi í heiminum.

Financial Times bendir á að þótt þetta sjónarmið sé gott og blessað geti ákvörðun ekki komið betur fyrir eigendur De Beers en nákvæmlega núna. Fyrir dyrum stendur að skrá félagið á markað á næsta ári.