Verðbólgan hérlendis enn undir meðallaginu á evrusvæðinu

Verðbólgan hér á landi miðað við samræmda vísitölu neysluverðs á evrusvæðinu mældist 2,3% í febrúar og hækkar lítillega frá því í janúar en þá var hún 2,2%. Þetta er í annar mánuðurinn í röð síðan í janúar árið 2008 sem verðbólgan hér á landi mælist undir meðalverðbólgu í ríkjum EES.

Fjallað er um málið í Morgunkorni greiningar Íslandsbanka. Þar segir að Samræmd vísitala neysluverðs hefur hækkað um 2,4% að meðaltali á síðastliðnum tólf mánuðum á evrusvæðinu. Eykst verðbólgan því frá fyrri mánuði, en í janúar nam tólf mánaða hækkunartaktur vísitölunnar 2,3%. Verðbólgan er nokkuð meiri ef miðað er við allt Evrópska efnahagssvæðið (EES), en í febrúar síðastliðnum nam tólf mánaða taktur vísitölunnar 2,8% sem er það sama og hann var mánuðinn á undan.

Ekki kemur á óvart að þessi tólf mánaða hækkun á samræmdu vísitölunni í febrúar síðastliðnum eigi rætur sínar að rekja til hækkunar orkuverðs á tímabilinu. Er þessi aukning verðbólgunnar því augljóslega ekki til marks um mikinn gang í efnahagslífinu í ríkjum evrusvæðisins, eða EES í heild.

Af löndum EES var verðbólgan mest í febrúar í Rúmeníu (7,6%), næstmest í Eistlandi (5,5%) og þriðja mest í Búlgaríu (4,6%). Minnst var verðbólgan í Sviss (0,5%) og svo á Írlandi (0,9%). Þrátt fyrir að verðbólgan sé ekki mikil á Írlandi er þetta mesta verðbólga sem verið hefur þar í landi í tvö ár enda hefur tólf mánaða taktur verðbólgunnar þar í landi oftar en ekki verið neikvæðum formerkjum á tímabilinu.