Ólafur Bjarki: Allir tilbúnir

Ólafur Bjarki Ragnarsson, skyttan öfluga í liði HK, á von á hörkuleik gegn Akureyri í úrslitakeppni N1-deildar karla í kvöld.

Um oddaleik er að ræða í rimmu liðanna í undanúrslitum og því heilmikið undir. Akureyri er núverandi deildarmeistari og spilar því á heimavelli í kvöld. Norðanmenn verða því að teljast sigurstranglegri aðilinn en Ólafur segir að HK-menn munu ekkert gefa eftir.

Akureyri vann fyrsta leikinn á heimavelli, 26-24, en HK-ingar svöruðu af miklum krafti á laugardaginn með átta marka sigri, 31-23. Ólafur Bjarki skoraði samtals sautján mörk í þessum tveimur leikjum.

„Við náðum loksins að vinna þá síðast," sagði hann en það var fyrsti sigur HK á Akureyri í fimm tilraunum í vetur. „Ég samt efast stórlega um það að Akureyri eigi tvo svona slæma leiki í röð og því á ég von á hörkuslag."

„Lykilatriði fyrir okkur er að halda hraðaupphlaupunum þeirra niðri. Vörnin og markvarslan mun hafa mikið að segja fyrir okkur og svo þarf að hafa líka smá heppni með sér."

Sveinbjörn Pétursson, markvörður Akureyrar, hefur átt frábært tímabil en svo virðist sem að Ólafur Bjarki finni sig vel gegn honum.

„Mér hefur gengið ágætlega með hann. Ég spilaði með honum í nokkur ár og þekki hann því ágætlega," sagði hann í léttum dúr.

Ólafur Bjarki meiddist lítillega á hné í fyrri leiknum á Akureyri en segir að það hafi ekkert háð sér. „Þetta er fyrsta tímabilið í langan tíma þar sem ég hef verið laus við meiðsli og hnéð er ekkert að hrjá mig. Það eru einfaldlega allir tilbúnir í þennan leik og ekki hægt að gera meira. Ég vona bara að það skili sér inn á vellinum."

„Ég á von á jöfnum leik. Það er ólíklegt að eitthvað annað gerist. Þetta mun reyna á taugarnar."