NBA: Miami kláraði Boston - OKC komið í bílstjórasætið

Miami Heat sló út Boston Celtics, 4-1, eftir að hafa unnið fimmta leik liðanna 97-87 á heimavelli þeirra í Miami.

Leikurinn var mjög jafn allan tíman en gestirnir í Boston höfðu ákveðið frumkvæði fyrstu þrjá leikhlutana. Í byrjun fjórða leikhluta virtust Boston vera með góð tök á leiknum, en þegar Miami Heat neitaði að gefast upp.

Þegar fjórar mínútur voru eftir af leiknum var staðan 87-81 fyrir Boston, en þá fóru gestirnir í sumarfrí.

Miami skoraði síðustu 16 stig leiksins og þar fór fyrir þeim einn allra besti körfuboltamaður heimsins, Lebron James, sem í raun kláraði leikinn upp á sitt einsdæmi. Miami Heat er því komið í úrslitaeinvígi Austurdeildarinnar eftir 4-1 sigur í einvíginu gegn Boston.

Dwyane Wade skoraði 34 stig, tók 10 fráköst og gaf 5 stoðsendingar fyrir Miami. Lebron James skoraði 33 stig og tók 7 fráköst, en þessir tveir leikmenn skoruðu 67 stig af þeim 97 sem Miami Heat skoraði í leiknum.

Ray Allen var atkvæðamestur hjá Boston með 18 stig, en þeir eru komnir í sumarfrí. Miami Heat mætir annaðhvort Chicago Bulls eða Atlanta Hawks í úrslitum Austurdeildarinnar.



Fyrir leik Oklahoma City Thunders og Memphis Grizzlies var staðan í einvíginu 2-2, en OKC vann síðasta leik liðanna eftir einn svakalegasta leik ársins sem framlengja þurftu þrisvar sinum.



Fimmti leikur liðanna fór fram í Oklahoma, heimavelli OKC. Heimamenn höfðu yfirhöndina allan leikinn og Memphis Grizzlies náði sér aldrei almennilega á strik.



Oklahoma City Thunders náði mest 27 stiga forystu í leiknum og unnu að lokum 99-72. Zach Randolph, leikmaður Memphis Grizzlies, náði sér alls ekki á strik í leiknum í nótt en hann hefur verið frábær í gegnum úrslitakeppnina.

Kevin Durant var stigahæstur í liði Oklahoma City Thunders með 19 stig, en Marc Gasol, leikmaður Mempis Grizzlies var atkvæðamestur hjá gestunum með 15 stig.

Næsti leikur fer fram í Memphis, en þá getur Grizzlies jafnað einvígið, tapi liðið eru þeir komnir í sumarfrí. Vinni Oklahoma Thunders leik sex munu þeir mæta Dallas Mavericks í úrslitaeinvígið Vestursdeildarinnar.