Kaup Microsoft á Skype staðfest

Tímaritið Fortune hefur fengið staðfest að búið sé að ganga frá kaupum Microsoft á netsímafyrirtækinu Skype. Kaupverðið er 8,5 milljarðar dollara eða um 970 milljarðar kr. Inn í verðinu er yfirtaka á skuldum Skype.

Í frétt um málið á CNN Money segir að reiknað sé með formlegri tilkynningu um kaupin á næsta klukkutímanum eða svo.

Samkvæmt samkomulaginu verður Skype sérstök viðskiptadeild innan Microsoft og mun Tony Bates, núverandi forstjóri Skype, stjórna henni. Hann verður mun svo aftur heyra beint undir Steve Ballmer forstjóra Microsoft.