Nowitzki skoraði jafnmikið í fjórða og súperstjörnur Miami til samans

Dirk Nowitzki fór á kostum þegar Dallas Mavericks liðið tryggði sér NBA-meistaratitilinn með því að vinna 105-95 sigur á Miami Heat í nótt í sjötta og síðasta leik liðanna í úrslitaeinvíginu. Dallas vann þar með einvígið 4-2 og fagnaði sínum fyrsta NBA-meistaratitli frá upphafi.

Dirk Nowitzki var kosinn besti leikmaður úrslitaeinvígsins en hann skoraði 26,0 stig að meðaltali í einvíginu, tók 9,7 fráköst og gaf 2,0 stoðsendingar í leik. Nowitzki hitti úr 41,6 prósent skota sinna og setti niður 97,8 prósent vítanna í einvíginu.

Það var samt í fjórða leikhlutanum sem Nowitzki gerði einkum gæfumuninn fyrir sitt lið. Nowitzki skoraði 62 stig í fjórða leikhlutanum í einvíginu þar sem hann hitti úr 51 prósent skota sinna utan af velli og setti niður öll 24 vítaskotin sín. Leik eftir leik kláraði Dirk sóknir Dallas þegar ekkert mátti útaf bregða og það vóg þungt þegar upp var staðið.

Stórstjörnur Miami Heat, Dwyane Wade og LeBron James, skoruðu samtals 62 stig í fjórða leikhlutanum í einvíginu eða jafnmikið og Nowitzki. James skoraði 18 stig í fjórða leikhlutanum í þessum sex leikjum eða 44 færri stig en Dirk og það var því Wade sem sá til þess að þeir félagar skoruðu jafnmikið og Nowitzki í fjórða leikhlutanum í þessu einvígi.