Schmeichel betri í markinu en á markaðinum

Hinn þekkti danski markmaður Peter Schmeichel þénaði milljarða á ferli sínum, einkum hjá enska félaginu Manchester United. Þeir milljarðar eru að stórum hluta að gufa upp því fjárfestingar markmannsins hafa gengið einstaklega illa í gegnum tíðina. Schmeichel reyndist mun betri í markinu en á markaðinum.

Fjallað er um málið í Ekstra Bladet. Þar segir að talið sé að Schmeichel hafi þénað vel yfir 3 milljarða kr. þau 16 ár sem hann lék sem atvinnumaður í fótbolta. Eignarhaldsfélög hans hafa hinsvegar tapað miklu fé á síðustu árum. Þannig er GD Holding Aps í yfir 200 milljóna kr. mínus eftir misheppnaðar fjárfestingar.

Annað eignarhaldsfélag markmannsins fyrrverandi, GD Procon Aps, sýndi methagnað árið 2008 en síðan hefur hallað undan fæti og skuldar félagið nú nær 100 milljónir kr. Þá fékk Schmeichel töluverðan  skell þegar Roskilde bankinn fór á hausinn. Með þroti bankans tapaði Schmeichel hlut sínum í golfvellinum Ledreborg Palace í Lejre.

Þá er ótalið að á árunum 1999 til 2002 átti Schmeichel fótboltaliðið Hvidovre Boldklub og er talið að eignarhaldið á liðinu hafi kostað hann a.m.k. rúmlega 300 milljónir kr.