Citigroup: Brent olían lækkar í 95 dollara

Citigroup gaf út olíuspá í morgun þar sem Brent-olíunni var spáð verðlækkun niður í 95 dollara á tunnuna fyrir árslok og að meðalverð hennar myndi verða 86 dollarar á tunnu á næsta ári.

Fjallað er um málið í Morgunkorni greiningar Íslandsbanka. Þar segir að olíuverð á heimsmarkaði hefur lækkað um u.þ.b. 8% í krónum talið frá síðustu mánaðamótum og um nálega 13% undanfarna 4 mánuði.

Tunnan af Brent-olíu kostar þegar þetta er ritað tæpa 109 dollara, sem jafngildir 12.300 kr., en hæst fór Brent-olían í ríflega 14.000 kr. á tunnu í apríl síðastliðnum. Á þennan kvarða er olíuverð þó enn nærri 40% hærra en það var fyrir ári síðan. Lækkunin frá ágústbyrjun skýrist að mestu leyti af 6% lækkun á verðinu í dollurum talið, en einnig hefur krónan styrkst nokkuð gagnvart dollara á tímabilinu.

Verð á hráolíu hækkaði raunar nokkuð á mörkuðum í morgun eftir lækkun í gær þegar í ljós kom að lengra virðist í lok borgarastyrjaldarinnar í Líbýu, og í kjölfarið endurkomu landsins sem olíuútflytjanda á heimsmarkaði, en útlit var fyrir. Líbýa framleiddi fyrir borgarastyrjöldina nærri 2% af heildarframleiðslu á heimsvísu, eða 1,6 milljón tunnur á dag.

Ýmsir sérfræðingar eru þó á því að olíuverð muni lækka frekar á næstunni. Þannig gaf Citigroup út olíuspá í morgun þar sem Brent-olíunni var spáð verðlækkun niður í 95 dollara á tunnuna fyrir árslok og að meðalverð hennar myndi verða 86 dollarar á tunnu á næsta ári. Spáin jafngildir ríflega 13% lækkun á olíuverði á síðasta þriðjungi ársins. Eru slæmar horfur í stærstu hagkerfum heims og aukið framboð á olíu frá Líbýu meðal raka fyrir spá Citigroup.

Lækkandi eldsneytisverð er kærkomið fyrir íslensk heimili, sem hafa horfst í augu við 22% hækkun á þessum útgjaldalið undanfarið ár. Eldsneyti vegur u.þ.b. 6% í vísitölu neysluverðs og hefur þróunin því haft umtalsverð áhrif á verðtryggð lán heimilanna. Gerum við ráð fyrir að lækkun eldsneytis hér á landi muni vega til 0,1% lækkunar vísitölunnar í ágúst. Bensínverð hefur lækkað um 3% frá miðjum júlímánuði, en einhver hluti þeirrar lækkunar er raunar til kominn eftir mælingu Hagstofunnar á neysluverði um miðjan mánuðinn.

Gangi spár Citigroup-manna og annarra skoðanabræðra þeirra eftir gæti því þróun eldsneytisverðs haldið nokkuð aftur af verðbólgu hér á landi næsta kastið, að því gefnu að krónan gefi ekki verulega eftir að nýju.