Ólafur Bjarki verður áfram hjá HK

Handknattleiksmaðurinn Ólafur Bjarki Ragnarsson sem leikið hefur með HK í N1-deildinni undanfarinn ár hefur samið á ný við Kópavogsfélagið.

Ólafur skrifaði í gærkvöldi undir samning við félagið og verður leikmaður HK út næstu leiktíð, en frá þessu er greint á heimasíðu HK.

Ólafur Bjarki var valinn besti sóknarmaður N1-deildarinnar á lokahófi HSÍ eftir síðustu leiktíð en hann átti magnað tímabil fyrir HK. HK komst í úrslitakeppnina á síðustu leiktíð en féll úr leik fyrir Akureyri í oddaleik fyrir norðan.

Félagið hefur eflt leikmannahópinn fyrir komandi átök og því verður fróðlegt að fylgjast með liðinu í vetur.