Gunnar hættur með Aftureldingu og Reynir Þór tekur við

Gunnar Andrésson mun stýra liði Aftureldingar í síðasta sinn í N1 deild karla í handbolta á móti Gróttu á sunnudaginn kemur en Gunnar Andrésson óskaði eftir því að fá að láta af störfum vegna persónulegra ástæðna. Þetta kemur fram í fréttatilkynningu frá Aftureldingu.

Stjórn handknattleiksdeildar Aftureldingar óskaði eftir því að Gunnar myndi ekki hætta strax heldur stjórna liðinu í Gróttuleiknum og féllst Gunnar á það. Gunnar hefur þjálfað lið Aftureldingar í eitt og hálft ár.

Reynir Þór Reynisson mun taka við starfi Gunnars og hann stýrir liðinu í fyrsta sinn á móti Haukum í Mosfellsbænum í næstu viku.

Afturelding hefur tapað þremur fyrstu leikjum sínum í N1-deild karla þar á meðal með átta marka mun, 22-28, á móti HK um helgina.