Talið að þjóðaratkvæðagreiðslan muni snúast um aðild að evrusvæðinu

Nicolas Sarkozy frakklandsforseti og Angela Merkel kanslari Þýskalands beindu því til George Papandreou forsætisráðherra Grikklands að standa við skuldbindingar sínar og ákveða hvort að Grikklandi vilji vera hlut af evrusvæðinu.

Þetta er á meðal þess sem kom fram á fundi með leiðtogum Evrópusambandsríkjanna í kvöld. Á fundinum hefur meðal annars verið náð samkomulag um björgunaraðgerðir fyrir Grikkland en eftir að Papandreou boðaði til þjóðaratkvæðagreiðslu um björgunarpakkan brá mönnum heldur betur í brún.

Financial Times segir að þjóðaratkvæðagreiðslan muni snúast um það að hvort að Grikklandi eigi að vera hluti af evrusvæðinu en ekki hvort að samþykkja eigi björgunarpakkann. Talsmaður ríkisstjórnar Grikklands sagði þó í kvöld að það yrði ekki svo. Greitt yrði atkvæði um fjárhagsaðstoðina en ekki um aðild landsins að evrusvæðinu.

Það er þó talið víst að á endanum muni atkvæðagreiðslan snúast um aðildina að svæðinu. Skoðanakannanir benda til þess að grískir kjósendur muni hafna björgunaraðgerðinum í atkvæðagreiðslunni. Wolfgang Schäuble, fjármálaráðherra Þýskalands, sagði að björgunarpakkinn væri í boði til þess að bjarga landinu frá gjaldþroti.