Uppsveifla á evrusvæðinu

Ein af mikilvægustu lykiltölum fyrir fjármálageirann á evrusvæðinu sýnir að uppsveiflan á svæðinu er komin í nokkuð stöðuga framþróun.

Um er að ræða svokallaða PMI vísitölu sem mælir virknina í framleiðslu- og þjónustugeirum evrulandanna. Vísitalan hækkaði í 56,3 stig í janúar en sérfræðingar höfðu gert ráð fyrir að hún myndi hækka í 55,6 stig, að því er segir í frétt á börsen.dk um málið.

"PMI vísitalan í dag sýnir að uppsveiflan á evrusvæðinu er að aukast þrátt fyrir að skuldakreppan sjóði í bakgrunninum," segir Frank Öland Hansen aðalhagfræðingur Danske Bank. "Vísbendingar eru um að vöxturinn sé að færast frá iðnaðargeiranum og yfir í þjónustugeirann."

Hansen telur að þrátt fyrir 10,1% atvinnuleysi á evrusvæðinu sé kreppan á svæðinu nú að baki. Það er einkum þýska aflvélin sem keyrir áfram hina jákvæðu þróun.

PMI vísitalan fyrir Þýskaland stendur nú í 61 stigi og hefur ekki verið hærri síðan í júlí árið 2006 þegar hún náði 61,5 stigum.