Mótmælin kosta Egyptland 36 milljarða á dag

Mótmælin í Eyptlandi hafa hingað til kostað hagkerfi landsins 36 milljarða kr. á dag. Þetta kemur fram í skýrslu greiningar franska bankans Credit Agricole um málið.

Hagfræðingar bankans hafa þar að auki endurmetið hagvaxtarspá sína fyrir Egyptaland. Gera þeir ráð fyrir 3,7% hagvexti í ár í stað 5,3% í fyrri spám.

Í skýrslunni segir að varanlegur órói í stjórnmálum Egyptlands og áframhaldandi ofbeldi gæti haft eyðileggjandi áhrif á ferðamannaiðnað landsins. Tekjur af ferðamannaþjónustu námu 6% af landsframleiðslunni á síðasta ári en þær gætu auðveldlega minnkað niður í það sem þær voru fyrir árið 2004.

Ennfremur segir í fréttinni að næsta stjórn Egyptalands sjái fram á minnkandi skatttekjur vegna mótmælanna á sama tíma og þröfin fyrir að niðurgreiða matvæli og eldsneyti aukist. Niðurgreiðslur sem séu nauðsynlegar til að halda reiði almennings í skefjum. Af þessu sökum telur Credit Agricole að hallin á fjárlögum landsins gæti orðið 12,3% í ár en hann nam 8,2% í fyrra.