City samþykkir kaupverð á Dzeko

Manchester City hefur komist að samkomulagi um kaupverð á framherjanum Edin Dzeko við þýska úrvalsdeildarfélagið Wolfsburg.

Talið er að kaupverðið sé um 30 milljónir punda en Dzeko er 24 ára gamall og hefur skorað 66 mörk í 111 leikjum með Wolfsburg.

Hann er samningsbundinn þýska félaginu til 2013 en félögin hafa nú komist að samkomulagi, samkvæmt Roberto Mancini, stjóra City.

„Framundan er mikilvægur leikur gegn Arsenal og mun ég ræða um leikmanninn eftir hann," sagði Mancini við enska fjölmiðla í dag. „Við höfum komist að samkomulagi um kaupverð. Hann er góður leikmaður og öll liðin í Evrópu vildu fá hann."