NBA í nótt: Billups tryggði Clippers sigur á Dallas

Chauncey Billups sá til þess að lið hans, LA Clippers, vann nauman sigur á meisturunum í Dallas Mavericks í NBA-deildinni í nótt, 91-89, með því að setja niður þriggja stiga körfu þegar ein sekúnda var til leiksloka.

Mo Williams var stigahæstur hjá Clippers með 26 stig en hann hitti úr fyrstu sjö skotunum sínum í leiknum. Blake Griffin var með fjórtán stig, sautján fráköst og sjö stoðsendingar en Chris Paul er enn frá vegna meiðsla.

Þetta var góður sigur hjá Clippers sem hefur verið í meiðslavandræðum auk þess sem að þetta var þriðji leikur liðsins á jafn mörgum dögum.

Hjá Dallas voru þeir Dirk Nowitzky og Delonte West stigahæstir með sautján stig hvor.

Memphis vann svo fjórða sigur sinn í röð í nótt er liðið hafði betur gegn New Orleans á útivelli, 93-87. Marc Gasol var með 22 stig otg tólf fráköst og Mike Conley með átján stig og tíu stoðsendingar. Þetta var fimmta tap New Orleans í röð ogþað ellefta í síðustu tólf leikjum.

Boston vann loksins sigur eftir fimm leikja taphrinu er liðið vann Toronto, 96-73. Rajon Rondo 21 stig þrátt fyrir að hafa farið meiddur af velli í þriðja leikhluta. Sigur Boston var þó öruggur.

Phoenix hafði einig tapað fimm leikjum í röð en vann New York í nótt, 91-88. New York tapaði sínum fjórða leik í röð.

New Jersey vann sinn fyrsta heimasigur á tímabilinu er liðið vann Golden State, 107-100. Deron Williams skoraði 24 stig og fór fyrir sínum mönnum í leiknum.

San Antonio var ekki lengi að jafna sig á tapleiknum gegn Miami í fyrrinótt og vann Orlando í framlengdum leik á útivelli, 85-83. Tony Parker skoraði 25 stig í leiknum, þar af sextán í fjórða leikhluta og framlengingunni.

San Antonio hafði tapað tíu útileikjum í röð og þetta var fyrsti sigur liðsins á útivelli á tímabilinu.

Oklahoma City hafði verið á miklu skriði og unnið sjö leiki í röð en tapaði fyrir Washington í nótt, 105-102, þrátt fyrir að Russell Westbrook skoraði 36 stig fyrir liðið og Kevin Durant 33.

Úrslit næturinnar:

LA Clippers - Dallas 91-89

Sacramento - Indiana 92-89

Atlanta - Portland 92-89

New Orleans - Memphis 89-93

Boston - Toronto 96-73

New York - Phoenix 88-91

New Jersey - Golden State 107-100

Orlando - San Antonio 83-85

Philadelphia - Denver 104-108

Washinigton - Oklahoma City 105-102

Minnesota - Detroit 93-85