Lét húðflúra á sig tár undir augað

"Tárið sýnir að ég er enn grátandi inn í mér," sagði Amar'e Stoudemire, leikmaður NY Knicks. Hann hefur látið húðflúra tár undir hægra augað í minningu bróður síns.

Bróðir hans, Hazell, lést í bílslysi í Flórída í síðustu viku. Stoudemire missti af fjórum leikjum með Knicks þar sem hann fór til Flórída að syrgja með fjölskyldunni.

"Það er erfitt að útskýra hversu nánir við vorum. Hann var mín föðurímynd og lærifaðir í lífinu. Hann á stóran hluta af mínum árangri og ég græt stanslaust inn í mér."

Leikurinn gegn Raptors í gær var fyrsti leikur Stoudemire með Knicks eftir andlát Hazell.