Hardy skoraði 49 stig þegar Njarðvík stöðvaði sigurgöngu Snæfells

Njarðvík stöðvaði sjö leikja sigurgöngu Snæfells með því að vinna Snæfell með fimm stiga mun, 97-92, í leik liðanna í Iceland Express deild kvenna sem fram fór í Ljónagryfjunni í kvöld. Njarðvíkurkonur léku án leikstjórnandans Shanae Baker-Brice en Lele Hardy sá til þess að þær söknuðu hennar ekki mikið. Hardy var með 49 stig, 21 frákast og 8 stoðsendingar.

Njarðvík á enn möguleika á því að verða deildarmeistari þökk sé tapi Keflavíkur á Ásvöllum en um leið og þær tapa stigum eða Keflavíkur vinnur leik þá fer deildarmeistaratitilinn til Keflavíkurliðsins.

Njarðvík lék án aðalleikstjórnanda síns en það var ekki að sjá í byrjun. Njarðvíkurliðið skoraði tvær þriggja stiga körfur á fyrstu mínútu leiksins og komst í 6-0, 8-4 og 14-6 í upphafi leiks. Njarðvík var síðan 26-20 yfir eftir fyrsta leikhlutann.

Snæfell náði að minnka muninn í eitt stig í upphafi annars leikhlutans, 26-25, en Njarðvíkurliðið fór þá aftur í gang og tíu Njarðvíkurstig í röð komu liðinu í 44-31. Njarðvíkurliðið hélt góðri forystu út hálfleikinn og var með ellefu stiga forskot í hálfleik, 54-43.

Lele Hardy var komin með 25 stig og 13 fráköst í hálfleik og Petrúnella Skúladóttir skoraði 11 stig fyrir hlé en Kieraah Marlow skoraði 14 stig fyrir Snæfell og Hildur Björg Kjartansdóttir var með 10 stig.

Snæfellskonur voru ekkert á því að´gefast upp og voru búnar að koma muninum niður í tvö stig, 58-56, eftir sjö mínútna leik í þriðja leikhlutanum en Njarðvík var með fimm stiga forskot, 69-64, fyrir fjórða leikhlutann. Njarðvíkurliðið tryggði sér síðan flottan sigur með því að halda velli í fjórða leikhlutanum.

Njarðvík-Snæfell 97-92 (26-20, 28-23, 15-21, 28-28)

Njarðvík: Lele Hardy 49/21 fráköst/8 stoðsendingar, Petrúnella Skúladóttir 15, Eyrún Líf Sigurðardóttir 8/4 fráköst/6 stoðsendingar, Harpa Hallgrímsdóttir 7, Ína María Einarsdóttir 6, Erna Hákonardóttir 5, Ólöf Helga Pálsdóttir 4, Sara Dögg Margeirsdóttir 2, Salbjörg Sævarsdóttir 1.

Snæfell: Kieraah Marlow 22/8 fráköst/6 stoðsendingar, Jordan Lee Murphree 19/13 fráköst/5 stoðsendingar, Hildur Sigurdardottir 16/13 fráköst/7 stoðsendingar, Hildur Björg Kjartansdóttir 14/5 fráköst, Alda Leif Jónsdóttir 14, Helga Hjördís Björgvinsdóttir 7/5 fráköst.