Spænskir bankar sagðir fallvaltir

Spænskir bankar eru sagðir fallvaltir og hugsanlega þarf að koma þeim til bjargar með fjárframlagi frá spænska ríkinu og evrópska seðlabankanum, að því er greint er frá í New York Times í dag.

Það kemur meðal annars fram að 663 milljarða evra fasteignalánaskuldir, jafnvirði um nærri 110 þúsund milljarða króna, séu að sliga hagkerfið og bankar óttast að fólk muni í vaxandi mæli lenda í miklum vandræðum með að borga af fasteignalánum sínum.

Í umfjöllun New York Times kemur fram að erfið skuldastaða spænska ríkisins og heimila á Spáni hafi verið meginefni fundar Alþjóðagjaldeyrissjóðsins og Alþjóðabankans í síðustu viku, og er sagt í greininni að áhyggjur vegna stöðunnar á Spáni fari vaxandi.

Atvinnuleysi á Spáni er nú tæplega 24 prósent, og ríflega 50 prósent hjá fólki á bilinu 18 til 30 ára.

Sjá má umfjöllun New York Times hér.