Tárin féllu þegar ellefu ára heimsmet Seberle var slegið

Tugþrautarkappinn Asthon Eaton hneig til jarðar og grét gleðitárum þegar hann kom í mark í 1500 metra hlaupinu á bandaríska úrtökumótinu fyrir Ólympíuleikana í London um helgina. Heimsmetið í tugþraut, sem verið hafði í eigu Tékkans Romans Seberle í ellefu ár, var hans.

Aðstæður í Eugene í Oregon höfðu verið erfiðar alla helgina en sólin fann sér leið út úr skýjunum rétt fyrir lokagreinina. Eaton vissi fyrir 1500 metra hlaupið að hann þyrfti að bæta sinn besta tíma um 2.57 sekúndur til að slá heimsmetið. Hann gerði það og gott betur. Hann hljóp á 4:14.48 og bætti sinn besta tíma um 4.46 sekúndur við mikinn fögnuð áhorfenda á Hayward Field í Eugene.

„Fólk getur sagt það sem það vill en það eru töfrar hérna," sagði Eaton sem lauk keppni með 9.039 stig á sínum gamla heimavelli en Eaton keppti fyrir Háskólann í Oregon (University of Oregon) á sínum tíma. Fjölmörg afrek í bandarískri frjálsíþróttasögu hafa unnist á Hayward-vellinum sem býr yfir töfrum að margra mati.

Heimsmet Seberle frá því árið 2001 í Götzis var 9.026 stig. Það var um leið í eina skiptið sem tugþrautarmaður hafði hlotið yfir 9000 stig. Áður var metið í eigu annars Tékka, Tomas Dvorak, en þar á undan stóð heimsmet Bandaríkjamannsins Dan O'Brien frá 1992, 8.891 sig, í sjö ár. Enginn Bandaríkjamaður toppaði O'Brien í tæp 20 ár eða þar til nú.

„Hann gaf aldrei eftir. Það er mjög auðvelt þegar maður hefur mikla forystu að gefa eftir. Það skilur hann frá öllum, mér meðtöldum. Ég er ekki viss um að ég hefði getað hlaupið úr mér lungun í 1500 metra hlaupinu," sagði O'Brien sem varð vitni að afreki Eaton.

Eaton bætti sig í fimm greinum af tíu og tryggði sér eitt af þremur sætum Bandaríkjamanna í tugþraut á Ólympíuleikunum. Einn þeirra sem sat eftir með sárt ennið var Ólympíumeistarinn Brian Clay.

Clay felldi síðustu grindina í 110 metra grindahlaupinu og var í fyrstu dæmdur úr keppni. Þrátt fyrir að sú ákvörðun væri skömmu síðar dregin tilbaka gerði Clay ógilt í öllum köstum sínum í kringlukastinu. Þótt möguleikar hans á að tryggja sæti sitt til London væru úr sögunni kláraði kappinn keppnina.

„Það var mikilvægt að klára þrautina. Ég hafði enga löngun til þess en hreinlega varð. Ég vildi ekki að börnin mín myndu minnast þess þegar faðir þeirra kláraði ekki þraut," sagði Clay sem felldi tár, vonbrigðatár, eftir grindarhlaupið.

Þrátt fyrir allt var Clay himinlifandi fyrir hönd landa síns Eaton sem gefur til kynna, enn á ný, hve nánir keppendur í tugþraut eru.

„Þetta var erfiður dagur fyrir mig en það var stórkostlegt að vera hluti af því sem gekk á hjá Asthon," sagði Clay um ótrúlega framgöngu Eaton í Oregon.

„Það er eins og allt lífið fari fram á tveimur dögum. Í stóra heiminum skiptir þetta ekki miklu máli en þetta er alheimurinn fyrir mér. Að gera eins vel og ég mögulega gat í mínum eigin heimi gerir mig afar glaðan," sagði Eaton sem einnig er heimsmethafi í sjöþraut.

Auk Eaton tryggði Trey Hardee sér sæti á Ólympíuleikunum í London. Hardee hafnaði í öðru sæti með 8383 stig.