Alfreð tryggði Helsingborg stig gegn Hirti Loga

Alfreð Finnbogason skoraði sitt níunda mark á leiktíðinni þegar hann tryggði Helsingborg 1-1 jafntefli á útivelli gegn IFK Gautaborg. Mark Alfreðs var af glæsilegri gerðinni, beint úr aukaspyrnu á 85. mínútu.

Hjörtur Logi stóð vaktina allan leikinn í vinstri bakverðinum hjá IFK Gautaborg en Hjálmar Jónsson var ekki í leikmannahópi liðsins.

Alfreð Finnbogason var í fremstu víglínu hjá gestunum og nældi sér í gult spjald auk þess að skora markið mikilvæga.

Gautaborgarliðið missti af dýramætum stigum í botnbaráttu deildarinnar. Liðið hefur nú 16 stig í 12.-13. sæti.

Helsingborg styrkti stöðu sína í 5. sæti deildarinnar. Liðið hefur nú 22 stig en Elfsborg er sem fyrr á toppi deildarinnar með 31 stig.

Þá vann Örebro 2-1 sigur á Malmö í kvöld. Eiður Aron Sigbjörnsson var á varamannabekk Örebro í leiknum.