Lögreglurannsókn hafin á peningaþvætti HSBC

Lögreglurannsókn er hafin í Bandaríkjunum á starfsemi HSBC stærsta banka Evrópu. Svo virðist sem glæpamenn hafi átt greiðan aðgang að viðskiptum í bankanum.

Hneykslið í kringum bankann virðist vaxa með hverjum degi eftir því sem fleiri upplýsingar berast úr skýrslu rannsóknarnefndar Öldungadeildar Bandaríkjaþings um starfsemi HSBC á árunum 2007 til 2010.

Peningaþvætti er áberandi í skýrslunni. Meðal þess sem komið er í ljós er að bankinn flutti 15 milljarða dollara í reiðufé frá Mexíkó og Rússlandi í gegnum útibú sín í Evrópu og Bandaríkjunum árin 2007 til 2009 án nokkurs eftirlits eða könnunnar á því hvaðan allt þetta reiðufé væri komið. Þetta fé samsvarar um þremur 40 feta gámum fullum af 100 dollara seðlum.

Sem dæmi um einn þeirra sem reiðufé var flutt fyrir er háttsettur maður í fíkniefnagengi í Mexíkó. Skömmu áður en hann var kominn í viðskipti hjá HSBC árið 2007 hafði fíkniefnalögreglan í Mexíkó lagt hald á rúmlega 200 milljónir dollara í reiðufé á heimili hans. Það er enn mesta reiðufé sem lagt hefur verið hald á í fíkniefnamáli í sögu landsins.

Vitnaleiðslur eru hafnar fyrir þingnefndinni og í þeim hafa stjórnendur HSBC lofað bót og betrun. Meðal annars segja þeir að bankinn hafi lokað um 20.000 reikningum í útibúi sínu á Cayman eyjum.