Óvissa um hagnað Facebook eftir slæmt gengi Zynga

Uppgjör bandaríska tölvuleikjafyrirtækisins Zynga fyrir síðasta ársfjórðung var neikvætt. Margir óttast að slæmt gengi fyrirtækisins gefi til kynna að uppgjör samskiptamiðilsins Facebook verði einnig neikvætt en rekstur fyrirtækjanna er nátengdur.

Zynga framleiðir sjö af tíu vinsælustu tölvuleikum sem notendur Facebook geta spilað. Þar á meðal er smáforritið Draw Something og Farmville.

Notendur þurfa ekki að greiða fyrir að spila tölvuleikina. Tekjur Zynga myndast þegar notendur kaupa sýndarvörur sem seldar eru í leikjunum. Þessar vörur eru næst stærsta tekjulind Facebook á eftir auglýsingasölu.

Í uppgjöri Zynga kemur fram að notendum og spilurum hafi fækkað þó nokkuð á síðustu mánuðum. Þá hefur sala á sýndarvörum dregist saman um tíu prósent.

Tólf prósent samanlagðra tekna Facebook eru tengdar Zynga.

Ársfjórðungsuppgjör Facebook verður birt eftir lokun Kauphallarinnar í New York í dag. Er þetta fyrsta uppgjör fyrirtækisins frá því að það var skráð á hlutabréfamarkað, 18 maí síðastliðinn. Síðan þá hafa hlutabréf fyrirtækisins verið í frjálsu falli.

Þannig er uppgjör Zynga talið varpa ljósi á slæman ársfjórðung Facebook.