Sögufræg Íslendingakrá í Kaupmannahöfn berst í bökkum

Hin sögufræga krá Hviids Vinstue við Kongens Nytorv í Kaupmannahöfn berst nú í bökkum og framtíð hennar er óljós.

Það eru framkvæmdir við útvíkkun á neðanjarðarlestakerfinu eða Metrónum í Kaupmannahöfn sem valda þessum erfiðleikum hjá Hviids Vinstue. Sökum framkvæmdanna, sem eru rétt fyrir utan glugga kráarinnar hefur gestum þar fækkað verulega.

Fjallað er um málið í Politiken. Þar er haft eftir Per Möller núverandi eigenda Hviids Vinstue að hann hafi tapað sem svarar um 27 milljónum króna á undanförnu eina og hálfa árinu eða frá því að framkvæmdirnar hófust og honum hefur ekki tekist að fá skaðabætur á móti frá borgaryfirvöldum.

Hviids Vinstue er elsta krá Kaupmannahafnar en hún hefur verið opin frá árinu 1723. Saga hennar er samofin Íslandssögunni en þjóðskáldið Jónas Hallgrímsson var meðal fastagesta hennar. Raunar var Jónas á heimleið frá Hviids Vinstue árið 1845 þegar hann hrasaði í stiganum heima hjá sér og lést skömmu síðar.

Þess má einnig geta að þekkt málverk eftir Örlyg Sigurðsson listmálara prýðir einn af veggjunum á Hviids Vinstue.

Fram kemur í Politiken að annar þekktur staður sem stóð nærri Hviids Vinstue hafi þegar orðið gjaldþrota vegna framkvæmdanna. Það er veitingahúsið A Porta sem starfað hafði við Kongens Nytorv frá árinu 1792.