Búið að frumsýna nýja mynd með Durant

Leikmenn NBA-deildarinnar nýttu tímann misvel þegar verkfall var í deildinni. Kevin Durant, leikmaður Oklahoma Thunder, nýtti tímann til þess að leika í kvikmynd sem nú er búið að frumsýna.

Myndin heitir Thunderstruck en í henni er Durant að leika sjálfan sig. Gamla brýnið Jim Belushi leikur á móti honum.

Karakter Belushi er mikill aðdáandi Thunder og hann fær hæfileika Durant í myndinni. Um er að ræða fjölskyldumynd sem sögð er vera í anda Space Jam þar sem Michael Jordan og fleiri NBA-stjörnur fóru á kostum.

"Ég hef gaman af því að gera eitthvað nýtt og spennandi. Það er mér ekki eðlislægt að leika en ég vil stíga út fyrir boxið og hafði gaman af þessu. Útkoman er líka góð," sagði Durant sem labbaði rauða dregilinn í svörtum bol, gráu vesti og hvítum gallabuxum.