De la Hoya neytti áfengis og eiturlyfja fyrir bardaga

Fyrrum heimsmeistararnir í hnefaleikum, Oscar de la Hoya og Julio Cesar Chavez, viðurkenndu báðir í spjallþætti á ESPN-sjónvarpsstöðinni að hafa misnotað áfengi og eiturlyf fyrir bardaga.

Báðir kappar hafa fyrir nokkru lagt hanskana á hilluna og viðurkenna nú að lífernið hafi ekki alltaf verið í lagi.

Gulldrengurinn De la Hoya segist hafa drukkið fyrir tvo heimsmeistarabardaga. Chavez sagðist oft hafa gert það.

De la Hoya segir að drykkjan hafi oft verið þaulskipulögð svo hún kæmi ekki fram í lyfjaprófum.

"Við vorum mjög gáfaðir og kunnum að fara fram hjá kerfinu. Í lokabardögum mínum var ég að drekka vín og bjór viku fyrir bardaga. Ég óttaðist ekki að tapa," sagði De la Hoya.

Báðir kapparnir hafa farið í meðferð og hafa ekki drukkið í nokkur ár.